Dy kandidatë të Partisë Socialdemokrate të drejtuar nga Tom Doshi janë tërhequr nga gara për zgjedhjet parlamentare të 11 majit në qarkun e Lezhës. Bëhet fjalë për Leonard Trokthin dhe Etmond Stojanin, të cilët ishin pjesë e listës së hapur me shtatë kandidatë të PSD-së në këtë qark.
Sipas burimeve për A2 CNN, të dy kanë dorëzuar zyrtarisht dorëheqjet në Komisionin Qendror të Zgjedhjeve, duke e çuar në 17 numrin total të kandidatëve që janë tërhequr deri më tani nga gara në nivel kombëtar.
Në dokumentet zyrtare të paraqitura pranë KQZ-së, Trokthi dhe Stojani deklarojnë se tërheqja vjen për shkak të “pamundësisë aktuale për t’u përfshirë në fushatën zgjedhore”, duke shtuar se vendimi është përfundimtar dhe i parevokueshëm.
Megjithatë, për shkak të afateve të shtypjes dhe shpërndarjes së materialeve zgjedhore, emrat e tyre do të vazhdojnë të figurojnë në fletët e votimit, ndonëse ata nuk do të jenë më aktivë në garën elektorale.
Tërheqja e këtyre kandidatëve ka ngjallur reagime dhe diskutime në qarqet politike lokale, ndërkohë që mbetet të shihet nëse do të ketë të tjera dorëheqje në ditët në vijim ndërsa fushata intensifikohet.
